Бай-Тайга кожууннуң Тээли суурунда «Авырал» немелде өөредилге төвүнүң башкылары «Россия» делгелге-шуулганга Тываны чедиишкинниг төлээлеп, чүгле регионну эвес, а боттарының онзагай кожуунун, усчу-дарган, уран-шевер чаңгыс чер чурттугларын алдаржытканы дээш удуртукчуларның байыр чедириишкиннеринге төлептиг болган.

Немелде өөредилге төвүнүң башкылары ТР-ниң Чазак даргазының оралакчызы – Москвада Тываның бүрүн эргелиг төлээзи Чечен Чоксумнуң болгаш республиканың Өөредилге яамызының сайыды Елена Хардикованың мурнундан өөрүп четтириишкин бижиктерин алганнар.

 «Республиканың удуртукчулары база Өөредилге яамызының сайыды Елена Хардиковага четтиргенивисти илередип тур бис. Шынап-ла, бистиң башкыларывыс делгелге-шуулганга Тывавыстың онзагайын дамчыдып, чер-чуртувустуң салым-чаяанныг кижилериниң дугайында таныштырар аас-кежиктиг болган. Тыва Республиканың стендизин москважылар, аалчылар, көрүкчүлер аажок сонуургаан» - деп, төптүң директору Долаана Тойбу-Хаа чугаалаан.