Тываның агроүлетпүр техникумунуң студентилери - «Профессионалитет» федералдыг төлевилелдиң киржикчилери. Олар частан эгелээш, часкы тарылга ажылдарынче үнүп, тарылганың аргаларын шинчилеп, көдээ ажыл-агый машина-техинказын болгаш дериг-херекселдерин шын ажыглаарын өөренип кирипкен.

Студентилер күскү дүжүт ажаалдазынга чедир ажылдаарлар. Оолдар 200 га черде кызыл-тасты, суланы, кырлыг-караны тарып эгелээн.
Дөрткү курстуң студентилери «Профессионалитет» федералдыг төлевилелдиң партнёру Михаил Санниковтуң шөлдеринде ажылдап, башкыларының удуртулгазы-биле бүдүрүлге практиказын эртип турар.

«Шөлдерге часкы тарылга ажылынга киржири бистиң студентилеривиске билиглерин быжыглаар таарымчалыг арга болур. Оолдар херек кырында ажылдап тургаш, арга-дуржулга кирер. Оон аңгыда көдээ ажыл-агый продукциязының үнезин билип, ажылчыннар кайы хире харыысалганы ап турарын көөрлер» - деп, техникумнуң директору Ольга Баркова чугаалаан.