Республиканың девискээринде назы четпээннерниң кадыкшылынга, амы-тынынга айыыл чок чоруун хандырары-биле ажылдар чоруттунуп турар.

Бо хүннерде Улуг-Хем кожууннуң Хайыракан ортумак школазы болгаш сумунуң чагырга чериниң ажылдакчылары «Подросток-Водоём» хыналда хемчегни чоруткан.

Хыналда үезинде башкылар хем-суг эриктерин хайгааравышаан, уруглар ортузунга хем кыдыынга дыштанылга үезинде айыыл чок чоруктуң дүрүмнерин сагыырының дугайында беседаны чоруткан. А чагырганың ажылдакчылары «Причал», «Элезин», «Сайлыг» база «Узун-Хөл» хөлдүң эриинде эң-не айыылдыг черлерге «Эштири хоруглуг» деп сагындырыг демдектерни тургускан.

Оон аңгыда Улуг-Хем кожууннуң өөредилге эргелелиниң болгаш чагырга чериниң ажылдакчылары Хайыракан, Ийи-Тал сумуларның девискээринде малчын турлагларже үнүүшкүннерни чоруткан.

Ажылчын бөлүк Хая-Баары, Даштыг-Хавак деп черлерде малчыннарның коданынга чедип, уругларның чайгы дыштанылгазын хынаар сорулгалыг хемчегни организастаан. Малчын турлагларда назы четпээн уруглар чок болган, ынчалза-даа чайгы үеде уругларның айыыл чок дыштанылгазының дугайында профилактиктиг чугааны малчыннар-биле чоруткан.