Бо чылын «Профессионалитет» федералдыг төлевилел езугаар баштайгы специалистер доозуп үнген. Олар Балгазын суурда Тываның агро-бүдүрүлге техникумунга чаа программа-биле өөренген. Ол дугайында республиканың Өөредилге яамызының сайыды Елена Хардикова дыңнаткан.

«2024 чылда «Профессионалитет» федералдыг төлевилел езугаар баштайгы специалистер доозуп үнген. Балгазын суурда Тываның агро-бүдүрүлге техникумунга 22 кижи көдээ ажыл-агыйның бүдүрүлге мастери, 24 кижи арга ажыл-агыйының 15 кижи үнүш өстүрериниң мастери деп мергежилдерни чедип алган. Оларның аразында кадыкшылының аайы-биле харык-шинээ кызыгаарлыг аныяк кижилер бар» - деп, сайыт Елена Хардикова демдеглээн.

30 хире аныяктарны «Профессионалитет» федералдыг төлевилелдиң партнёрлары - М.А. Санниковтуң, «Земля Надежды» болгаш «Новый путь» көдээ ажыл-агый бүдүрүлгелеринде, Балгазынның, Тес-Хемниң арга-арыг ажыл-агый черлеринде база «Вавиол» КХН-де ажылга тургускан. Арткан доозукчулар дээди эртем чедип алыры-биле улаштыр өөренир.

«Башкыларга болгаш бүдүрүлге мастерлеринге, «Профессионалитет» федералдыг төлевилелдиң кураторларынга байырым чедирип тур мен. А доозукчуларга профессионал хөгжүлдени болгаш чедиишкиннерни күзедим! 2025 чылдан тура Тывага даг база тудуг кластерлериниң аайы-биле белеткел эгелээр, а ооң соонда көдээ ажыл-агый кластерин сайзырадыр ажылды уламчылаар бис» - деп, сайыт демдеглээн.

#Профессионалитет