Тываның Баштыңы Владислав Ховалыг Каа-Хем кожууннуң федералдыг программалар болгаш национал төлевилелдер езугаар туттунуп турар социал объектилерни хынаан. Каа-Хем кожуунда өөредилге албан черлериниң капитал септелгезиниң дугайында ТР-ниң Өөредилге яамызының сайыды Елена Хардикова тодаргай таныштырылганы кылган.

«Көдээ девискээрлерниң комплекстиг хөгжүлдези» программа езугаар Сарыг-Сеп суурда «Родничок» уруглар садының капитал септелгези бо чылдың март айда эгелээн. Төлевилел-смета документилериниң аайы-биле ажылдың 70 хуузу күүсеттинген. Тываның Баштыңы Владислав Ховалыг уруглар садында септелгениң ажыл-чорудулгазын хынап көрген. Ук кожуунда Россияның Көдээ ажыл-агый яамызының программазы езугаар чаарттынып турар ийиги өөредилге инфраструктуразының объектизи болур. Регионалдыг оператор кылдыр Тываның Экономика яамызы кирип турар.

Подрядчик объектини күзүн долузу-биле дужаар. Чаштар чаарттынган садикче кирер. Уругларны чаа дыштанылга зоналары, чырык, чараш бөлүктер, чаа оруннар, столдар, сандайлар база ойнаарактар манаар. Садтың удуртулгазы-биле оран-саваның иштики-даштыкы девискээрлерин чаагайжыдар дугайында айтырыгны чугаалаштывыс.

Көдээ суурларның объектилери ук программаже «кирер» азы «кирбези» муниципалдыг администрацияларның идепкейлиг болгаш сонуургалдыг болурундан кол хамааржырын ооң мурнунда база демдеглээн мен. Амгы үеде Эрзин, Каа-Хем, Улуг-Хем кожууннарның өөредилге объектилерин программаже кииргени өөрүнчүг» - деп, сайыт Елена Хардикова демдеглээн.

Бо хүннерде «Родничок» уруглар садының чылыдылга болгаш суг хандырар системазын долузу-биле чаартып, капитал септелгениң ажылдарын доозуп турар. Ооң девискээрин база чаагайжыдар. Уруглар садынга чаа дериг-херекселди болгаш эт-септи салырын сагындыраал. Бүгү ажылдарже болгаш эт-сеп, дериг-херекселдерже федералдыг бюджеттен 120 сая хире рубльди аңгылаар.