Кызылдың Арыя Араптановна Алдын-оол аттыг 2 дугаар ортумак школазынга Шагаага тураскааткан «Шаг бажы келди - Бүдүү ай үндү» деп байырлыг хемчег болуп эрткен. Чараш хемчегниң хүндүлүг аалчылары кылдыр чалаткан Айлана Ховалыг, өөөредилге сайыды Алексей Храмцов база Национал школа хөгжүдер институттуң директору, күрүнениң тыва дыл инспектору Сайзана Товуу олар киришкен.

«Шагаа айының мурнунда Бүдүү айны Ак ай дээр. Ие-чер кыштың соонда оттуп, бодунуң чемижи-биле чемгерип эгелей бээр ...» деп, шак мындыг өндүр улуг сөстер-биле байырлыг шинчилиг хемчег эгелээн. Шагаа байырлалының эгези тус школаның тыва өг хевирлиг шиметтинген байдалынга эрткен. Тыва хөгжүм херексели игилдиң онзагай үнү байырлыг хемчегге улам чараш шинчини киирген.

Аалчыларга өөреникчилер болгаш башкылар тыва каас-чараш хептиг ыры-хөгжүмүн, танцы-самын база тыва ыры-кожамыктарын бараалгаткан. Шагаа байырлалында эрттирер оюн-тоглааны база көргүзүг кылдыр көргүскен. Чараш хемчегге уруглар болгаш башкылар хүндүлүг аалчыларга тыва чоннуң чырык байырлалы, ай санаашкыны-биле чаа чылдың үнери Шагаа болгаш езу-чаңчылдар дугайында таныштырып, оюн-көргүзүг кылдыр эрттирген.

Тываның өөредилге сайыды Алексей Храмцов байырлыг хемчегниң дугайында: «Меңээ Шагаа дээрге дыка солун байырлал-дыр. Бо чараш хемчегден ай санаашкыны-биле чаа чылды уткуурунга кандыг белеткелдер чорударын база езу-чаңчылдарның дугайында сонуургап билип алдым. Школаларда кижизидилге чорудуу тыва чоннуң улусчу чаңчылдарынга болгаш культуразынга үндезилеп даянган кезектер кирип турарынга дыка таарзындым».

#минобразованиятыва #шагаа2022 #шагаабиле