Тываның Өөредилге яамызы ажыл-чорудулгазының түңнелдерин база өөредилге адырының колдап турар хөгжүлде угланыышкыннарын коллегия хуралынга Тыва Республиканың Чазааның Даргазының оралакчызы Елена Хардикованың удуртулгазы-биле сайгарып чугаалашкан. Аңаа өөредилге эргелелдериниң начальниктери, Кызылдың школаларының директорлары, техникумнар удуртукчулары болгаш коллегияның кежигүннеринче кирип турар Тываның эртем ниитилелиниң төлээлери киришкен.

“Өөредилгениң шынары – регионнуң чедиишкинниг хөгжүлдезиниң үндезини” – деп тезис-биле Тываның Өөредилге яамызының төлээлери илеткээн. Ниитизи-биле кижизидилге айтырыын, кадрлар белеткелин, өөредилгениң инфраструктуразының сайзыралынга даянган база регионнуң өөредилге адырының шынарын бедидеринче айтырыгларны сайгарган. Тываның өөредилге сайыдының хүлээлгезин күүседип турар Ирина Биче-оолдуң демдеглеп турары-биле, өөредилгениң шынарын бедидери-биле ажылды үениң хөгжүлдези-биле деңге чоруп турар болгаш ажылынга инновациялыг аргаларны ажыглап, бодунуң сан-чурагайлыг өзүлдезин бедидип турар башкы бүрүзүнден эгелээри чугула. Ол ышкаш төрээн тыва дыл сайзыралын, кадагалап арттырарының дугайында айтырыгларны база чугаалашкан.

Эртем ниитилелиниң төлээлери – Национал музейниң директору Каадыр-оол Бичелдей, Эртем талазы-биле агентствонуң директору Алена Стороженко база ТывГУ-нуң эртем талазы-биле проректору Салима Ховалыг олар ук угланыышкын-биле ажылдарны деткиирин саналдаан.

Ниитизи-биле национал төлевилелдер, РФ-тиң Чырыыдыышкын яамызының төлевилелдериниң база регионалдыг төлевилелдерниң боттандырылгазы-биле сорулгалар күүсеттинген. Улуг хемчээлдиг 27 школаның капитал септелгези доозулган, Кызыл хоорайда, Сукпак, Бай-Хаак, Балгазын, Каа-Хем суурларда 616 биле 825 олуттуг школалар тудуу эгелээн. Ол ышкаш 60 биле 120 олуттуг 5 уруглар садының тудуу доозулган.

Суур черлерниң школаларында «Точка роста» база «ЦОС» кабинеттерин дерип ажыткан, Кызыл хоорайның № 3 школазында «Кванториум» уруглар төвүн база Тываның техникумнарында WorldSkills стандарттары-биле 11 мастерская дериттинген.

Капитал септелге 2023 чылда 13 школага уламчылаар, «Өөредилге» национал төлевилел-биле өөредилгениң системазын чаартырын уламчылаар. Оон аңгыда, Башкы болгаш дагдыныкчы чылында башкы мергежелди нептередип, чаа школаларга чаа кадрларны белеткээри болгаш социал деткимче көргүзер сорулгалыг “Мээң башкым” деп төлевилел ажылын эгелээр.

Чаңчыл езугаар Елена Хардикова РФ-тиң Чырыдыышкын яамызының шаңналдарын Тываның башкыларынга тывыскан. Ол ышкаш 2022 чылда ГИА-ның тергиин түңнелдерин көргүскен школа болгаш башкыларын база онзалап демдеглээн.

Коллегия хуралының түңнелинде Тываның Чазааның Даргазы Елена Хардикова коллегаларынга чаа 2023 чылда чедиишкиннерни, тиилелгелерни болгаш чаа бедиктерни күзээн.