Март айның 29-31 хүннеринде Даг-Алтайга Сибирьниң болгаш Ыраккы Чөөн чүк чоннар аразынга төрээн дылдарга олимпиаданың түңнел кезээ болуп эрткен. Аңаа Тывадан 9, 10, 11 класстарның 7 өөреникчизи киришкен. Ук олимпиада ооң мурнунда дистанциялыг хевирге эртип турган болза, бо чылын тус черниң бодунга бир дугаар болуп эрткен.

Республиканың В.К.Плакас аттыг гимназиязынга байырлыг ажыдыышкын соонда, киржикчи бүрүзү бодунуң белеткээн төлевилелин камгалап таныштырган. 2-ги кезээнде чечен чогаалга азы сөзүглелге сайгарылга ажылын кылган.

"Найыралдың кежээзи" чадазынга регион бүрүзү боттарын таныштырып, уран-талантызын көргүзүп бараалгаткан.

Бир дугаар баргаш киржир олимпиаданың түңнел кезээнге 6 регион киришкен: Тывадан -7, Хакасиядан-1, Бурятиядан -4, Якутиядан-3, Башкортостандан- 4, Алтайдан-7 киржикчи.

“Мөөрей бедик деңнелге эрткен.  Хүн бүрү, шак бүрүзүн тускай боданып каан программага дыка хөй чүүлдерни көөр аас-кежиктиг болдувус. "Маадай-Кара" алтай эпосту Национал театрынга көрүп, Алтай музей, театр, Катунь хемниң эрии, алтай дылды өөредип турар башкы училищези база башкылар билии бедидер институт дээш, чүү чок дээр” – деп, Даг-Алтайга олимпиадага киришкен өөреникчилер демдеглээн.

Олимпиаданың түңнел кезээнге 30 кижиниң санынче кирген аас-кежиктиг уругларга алтай чон хол-биле кылган суй-белектер база сертификаттар-биле шаңнаан.

 Ук киржикчилерниң башкыларынга регионнар аразынга төрел дылдарга быжыг билигни өөредип белеткээн башкыларга мактал бижиктерни тывыскан:

1. Ховалыг Зинаида Калдар-ооловна - Сүт-Хөл кожууннуң Бора-Тайга ортумак школазының Тыва Республиканың өөредилгезиниң алдарлыг ажылдакчызы.
2. Куулар Айлаңмаа Владимировна - Өвүр кожууннуң Хандагайты ортумак школазы.
4. Оюн Зоя Даржаевна - Хову-Аксы ортумак школазы.
5. Кунгаа Долчанмаа Кыргысовна - Хову-Аксы ортумак школазы.
6. Ооржак Ульяна Байыр-ооловна - Ак-Довурак № 1 ортумак школазы.
7. Бакаа Саяна Экер-ооловна - Хову-Аксы ортумак школазы.
Тыва Республиканың Өөредилге яамызының Салымныг уругларның сайзырал-депшилгезиниң төвүнге, ооң специализи Салчак Комбу, методизи Айлан Домбуу оларга школачыларны деткип чоргусканынга өөрүп четтиргенин илередип турар.

Даг-Алтайның төрээн (төрел) дылдар олимпиадазын бедик деңнелге эрттиргенин магадап көрдүвүс. Ук хемчегни федералдыг деңнелче үндүреринге улуг күжүн үндүрүп турарын тус черниң Өөредилге яамызы болгаш Чазааның эртем-шинчилел болгаш өөредилге талазы-биле оралакчызы Ольга Станиславовна, Екатерина Чендекова суглар таныштырган. Бо күзүн өөредилге чылының эгезинде кожа регионнарның төрээн дылдар башкыларының аразынга улуг арга-дуржулга, солчулга конференциязын эрттирерин сагындырды.

Кеней Чимит, Ондар Чайынды, Монгуш Байлак, Ооржак Тарина, Монгуш Алдын-кыс, Оюн Намгьелмаа, Оюн Өлчей - алтай, хакас, якут, бурят, башкир эштерлиг болуп, найыралдыг чанып келгеннер

Ульяна Ооржак, Ак-Довурак хоорайның 1 дугаар ниити билиг ортумак школазы.