Бо чылын «Земский учитель» программаның иштинде 8 хостуг олут талазы-биле конкурс шилилгезинге киржири-биле ниитизи-биле 81 чагыг кирген, оларның иштинден 35 башкы конкурс шилилгезинге киржири-биле күзелин илередип, документилерин киирген. Шак ынчалдыр, ортумаа-биле Тывада конкурс талазы-биле бир олутче 4 кижи кирип турар.

Улаштыр, 2023 чылдың апрель 16-дан 30-ге чедир конкурстуң шилилге чадазы болуп эртер. 2023 чылдың май 15-ке чедир конкурс шилилгезиниң 8 тиилекчиниң даңзызын сайгарып көөр болгаш бадылаар.

Сагындырып каарывыс, «Земский учитель» программа-биле чаңгыс катап компенсация төлевирин алыр эргени шилилгениң кол үнелел барымдааларынга дүгжүп турар кордакчыларның конкурс шилилгезиниң түңнелдери-биле – мергежил тайылбыр номнарында азы мергежил стандарттарында айыттынган мергежил негелдеринге дүгжүп турар ортумак профессионал азы дээди башкы билии бары болгаш 55 харга чедир назылыг башкылар алыр. Программаның кол негелдези – күш-ажыл керээзин чарган хүнден эгелеп, 5 чыл дургузунда көдээ школага башкы ажыл-хүлээлгени күүседири.

Тывада ук программа 2020 чылдан тура, боттанып турар. Программаның кол сорулгазы – көдээ школаларда хостуг олуттарны кызырары, көдээ черлер башкыларының социал ат-алдарын көдүрери база оларны өөредилге системазынче хаара тудары-биле немелде идиг бээрин тургузары.

Программаны боттандырып эгелээн чылында республиканың көдээ ниити билиг организацияларынга 23 хостуг олут хагдынган. 2022 чылда ыраккы суурларже ажылдаары-биле 18 кол болгаш профиль аайы-биле башкы чорупкан. Киржикчилерниң хөй кезиинде орус дыл болгаш литература, математика, даштыкы дылдар, эге класстар башкылары, биология болгаш химия, физика база информатика болгаш ИКТ башкылары колдап турар.

Архивтен чурук.

#минобразованиятыва #ЗемскийУчитель #поддержка #программа