Безин дүүн чаа-ла студентилер турган болза, а бо хүн олар доозукчулар. Элээн каш чылдар дургузунда олар берге өөредилге оруун ажып эрткеннер. Зачеттар, шылгалдалар, курс ажылдары, диплом ажылын камгалаары болгаш оон-даа хөй ажылдар! Бо бүгү чүгле чаңгыс сорулгалыг – бодунуң ажыл-херээниң мергежилин өөренип, дипломну холга алыры. Олар сорулгазынга чедип алганнар! Бо чылын республиканың профессионал өөредилге албан черлериниң ханаларындан 2688 студент доозуп үнген.

Доозукчуларга дипломнарны байырлыг байдалга тывыскан. Оларның аразындан хөй санныг доозукчулар өөредилгезинде, спортта чедиишкиннерлиг база янзы-бүрү хемчеглерге онза киржилгелери-биле сактыышкыннарында арткан. Боттарының өөренип турган техникумнар болгаш колледжтериниң аттарын төлептии-биле янзы-бүрү мөөрейлерге, акцияларга, олимпиадаларга, конференцияларга база фестивальдарга киржип, бедии-биле төлээлеп турган. Онзаланып ылгалган студентилерге Тыва Республиканың Өөредилге яамызының өөрүп четтириишкиннерин тывыскан.

Чаа дооскан аныяктарның аразындан чамдыызы улаштыр дээди өөредилге албан черлеринче өөренип кирер, а чамдыктары доозуп алган мергежилиниң аайы-биле ажылдап эгелээр планныг. А ол ышкаш шериг албанын эрттирер күзелдиг оолдар база бар.

Доозукчуларывыска салган сорулгаларынга чедип, эчизинге чедирерин күзээр-дир бис! Менди чаагай орукту күзедивис, хүндүлүг доозукчулар!