Тывада уругларның чайгы кадыкшыдылга дыштанылгазы уламчылап турар. Чайгы үеде хоорайда школалар чанында болгаш хоорайдан дашкаар дыштанылга лагерьлеринге ниитизи-биле 16 муң уруг хаара туттунар ужурлуг.

Уругларның хөй кезии хоорайдан дашкаар лагерьлерде, ук лагерьлер саны республикада – 19, дыштанып турары демдеглеттинген. Хоорайдан дашкаар лагерьлерге уругларның сонуургалы улуг болгаш, чай дургузунда 4 муң ажыг уругну хаара тудары көрдүнген. Хоорайдан дашкаар лагерьлерниң бирги сезонда 1232 уруг дыштанган, дыштанылганың бирги сезону адакталып турар. А «Бельбей» биле «Чодураа» лагерьлерде ийиги сезон ажыттынып, уругларны уткуп хүлээп алган.

Бо хүнде уругларның чайгы кадыкшыдылга лагерьлеринче путевкалар шупту долузу-биле саттынган. Ада-иелерниң уругларының чайгы дыштанылгазын эки, таарымчалыг организастап турары өөрүнчүг. Келир чылын база чайгы дыштанылга лагерьлеринче уругларны манап турар.

Дыңнадып каар чүүлүвүс – регионнарга бүдүн чыл дургузунда ажылдаар лагерьлерни ажыдар арганы бээр база бар лагерьлерни чаартыры-биле хоорайдан дашкаар лагерьлерни чаартыр талазы-биле федералдыг программаже киирер ажыл чоруттунуп турар. Чижек кылдыр алырга, республиканың Баштыңы Владислав Ховалыгның деткимчези-биле «Азас» лагеринде чаартылга эгелээн. Келир чайын аңаа чаа чаагайжыттынган бажың болгаш делгем чемненир чер ажыттынар.

Уругларның дыштанылгазынга хамаарыштыр айтырыгларны дараазында дугаарже долгап, специалистерден тодарадып ап болур: +7(394)222-72-92.