Кызылда июль 4-тен 6-га чедир болуп эртип турар «Күш-ажыл болгаш камгалалга белен» деп Бүгү Россияның күш-культура-спорт комплекизиниң фестивалының регионалдыг чадазы адакталып турар.

ГТО фестивалы дээрге, ГТО комплекизин күш-культура болгаш массалыг спорт адырында уругларның идепкейин тургузарынга таарымчалыг байдал таварыштыр уруглар аразынга нептередип делгередир сорулгалыг эрттирип турар онза хемчег. Регионалдыг чада бо хүннерде Совет Тываның 5 чыл аттыг стадионунда эртип турар.

Ук хемчег муниципалдыг чадаларның тиилекчилеринге болгаш призерларынга, а ол ышкаш маргылдааларга ГТО комплекизиниң тергиин мөңгүн демдээнге дүгжүп турар база оон-даа бедик түңнелдерлиг улуска янзы-бүрү атлетика болгаш спорттуң хевирлеринге боттарының күжүн болгаш арга-мергежилин шенеп көөр арганы берип турар.

Фестивальдың программазында - 60, 1500, 2000 метр хемчээлге маңнаары, черге чыдып алгаш холун бүшкүедир болгаш хөндүрери, гимнастика сандайынга туруп алгаш мурнунче ийленири, узун хемчээлге шураары, пневматиктиг ланчыыдан адары, бөмбүктү октаары, эштири, а ол ышкаш оолдар болгаш элээди оолдарга бедик турникке өрү тырттынары.

Команда бүрүзүнде 2 оол, уруг 2 аңгы категорияда 12-13 хар биле 14-15 харлыглар боттарының спортчу белеткелин база чедиишкиннериниң деңнелин бедидери-биле киржип турар.

Фестивальдың бүгү Росияның чадазы Крымның «Артек» лагеринге сентябрь төнчүзүнден октябрь айның ортузунга чедир болуп эртер. Аңаа регион бүрүзүнден ГТО комплекизиниң шенелде нормативтерин тергиин алдын демдекке күүсеткен регионалдыг чаданың тиилекчилеринден тургустунган чыынды командалар кирер.