Апрель 4-те Аныяктар ордузунга хары угда Бүгү Россия чергелиг чеди регионалдыг чадаларның база чаңгыс республика чергелиг башкылал мергежилиниң конкурузунуң байырлыг ажыдыышкыны болган.

Тываның өөредилге сайыды Алексей Храмцов демдеглеп турары-биле, конкурска киржири – башкы бүрүзүнүң чүгле улуг харыысалгазы эвес, а харын-даа ханы найыралче шилчи бээр, коллегалары, чаңгыс аай үзелдиг кижилер-биле харылзажылгадан өөрүшкү болур. «Силер чугула ажылды - өөреникчилерге боттарыңарның билиглериңерни дамчыдып, боттарын сайзырадыр күзелди оттуруп кижизидип, ниитилелге ажыктыг болурун, ада-чурттуң культурлуг езу-чаңчылдарынга хүндүткелди чаңчыктырып турар силер», – деп, өөредилге сайыды демдеглээн.

Конкурс өөредилге адырынга бодунуң сеткили-биле бердинген – республиканың өөредилге организацияларының кижизидикчилери, башкылары, бүдүрүлге өөредилгезиниң база немелде өөредилгениң мастерлери, педагог-психологтар чыылган. «Чылдың башкызы», «Чылдың кижизидикчизи», «Чылдың педагог-психологу», «Чылдың директору», «Тергиин эр педагог – лидер болгаш дагдыныкчы», «Кижини кижизидер» база «Чылдың мастери»(«Учитель года», «Воспитатель года», «Педагог-психолог года», «Всероссийский мастер-класс учителей родного, включая русского, языка», «Директор года», «Лучший педагог-мужчина – лидер и наставник», «Воспитать человека», «Мастер года»).

Бо чылдың конкурузунуң чаартылгазынга ооң мурнунда «Өөредилге организациязының тергиин удуртукчузу» («Лучший руководитель образовательной организации») дээр конкурс ам «Чылдың директору» («Директор года») кылдыр эртип турар. Ол ышкаш бо чылын катап бүгү российжи деңнелди алган «Кижини кижизидер» деп конкурс, сөөлгү катап 2019 чылда эртип турган.

Конкурстар чаа салым-чаяаннарны илередиринге болгаш башкылал мергежилинге тергиин үлегерлерни нептередиринге дузалаар. Регионалдыг чадаларның тиилекчилериниң аттары апрель 9-та билдинер болгаш эвээш эвес ажыдыышкыннарны болгаш чаа маадырларны чаңчыл езугаар үндүрер.

#минобразованиятыва #учитель2022